Пост канала TIKVAH-ETHIOPIA от 28 сент. 2026 г.

የትምህርት ሚኒስቴር በመንግሥት ዩኒቨርሲቲዎች የተማሪዎች ቅበላ፣ የትምህርት መስክ ምደባና ዝውውር በአንድ ወጥ፣ ግልጽ፣ ፍትሐዊና ተጠያቂነት ባለው አሠራር እንዲፈጸም አቅጣጫ ሰጠ። ሚኒስቴሩ በሁሉም የመንግሥት ዩኒቨርሲቲዎች ተማሪዎች በተመሳሳይ የአሠራር መርህ እንዲስተናገዱ በማስቀመጠው ሰርኩላር፣ ዩኒቨርሲቲዎች የቅበላ፣ የትምህርት መስክ ምደባና የዝውውር ሂደቶችን በተቀመጡ መስፈርቶች መሠረት ብቻ እንዲያከናውኑ አሳስቧል። 1. የተማሪዎች ቅበላ በሰርኩላሩ መሠረት ዩኒቨርሲቲዎች በትምህርት ሚኒስቴር በይፋ የተመደቡላቸውን ተማሪዎች የምደባ መረጃና አስፈላጊ ማስረጃዎችን ካጣሩ በኋላ በወቅቱ መቀበልና መመዝገብ አለባቸው። ዩኒቨርሲቲዎች ከሚኒስቴሩ ከተላለፈው የምደባ ውጤት ውጭ በራሳቸው ተነሳሽነት ተማሪ መቀበል፣ የተመደበበትን ተቋም መቀየር ወይም በሌላ ተቋም የተመደበን ተማሪ ያለአግባብ መመዝገብ እንደሌለባቸውም ተገልጿል። የመግቢያ ፈተና እንዲሰጡ የተፈቀደላቸው ተቋማትም ቅበላውን በተቀመጠው መስፈርትና ግልጽ በሆነ የውጤት አያያዝ ሥርዓት ማከናወን ይኖርባቸዋል። 2. የትምህርት መስክ ምደባ የትምህርት መስክ ምደባ ሲከናወን የሀገሪቱን የሰው ኃይል ፍላጎት፣ በኢኮኖሚ ሽግግሩ ቅድሚያ የሚሰጣቸውን መስኮች፣ የተማሪውን ውጤትና ምርጫ እንዲሁም የተቋሙን የቅበላ አቅም ታሳቢ እንዲደረግ ተደንግጓል። ምደባውም በግልጽ፣ ቀድሞ በሚታወቅና ለሁሉም ተማሪዎች በወጥነት በሚተገበር መስፈርት መፈጸም እንዳለበት ሰርኩላሩ ያስቀምጣል። በምደባው ወቅት ፦ - የተማሪው የመጀመሪያ ዓመት ወይም የዓመቱ አማካይ ውጤት፣ - የ12ኛ ክፍል ማጠናቀቂያ ፈተና ውጤት፣ - የተማሪው ምርጫ፣ - የትምህርት መስኩ የቅበላ አቅም፣ እንዲሁም እንደአስፈላጊነቱ በተቋሙ የሚሰጥ የመግቢያ ፈተና ታሳቢ እንዲደረጉ ተገልጿል። ተቋሙ የትምህርት መስክ መግቢያ ፈተና የሚሰጥ ከሆነ፣ የመጀመሪያ ዓመት አማካይ ውጤት 50 በመቶ፣ የ12ኛ ክፍል ውጤት 20 በመቶ እና የመስክ መግቢያ ፈተና 30 በመቶ እንዲያዝ ተቀምጧል። መግቢያ ፈተና በማይሰጥበት ጊዜ፣ በመጀመሪያው ዓመት ለሚከናወን ምደባ የዓመቱ አማካይ ውጤት 70 በመቶ እና የ12ኛ ክፍል ውጤት 30 በመቶ እንዲያዝ ተገልጿል። በሁለተኛው ዓመት መጨረሻ ለሚከናወን ምደባ ደግሞ የዓመቱ አማካይ ውጤት 80 በመቶ እና የ12ኛ ክፍል ውጤት 20 በመቶ እንዲያዝ ተደንግጓል። በተጨማሪም ለሴት ተማሪዎች፣ ለአካል ጉዳተኛ ተማሪዎችና ለሌሎች ተገቢ የሆነ እዎንታዊ ድጋፍ በወጥነት እንዲተገበር ተመላክቷል። ለሴትና ለአካል ጉዳተኛ ተማሪዎች በምደባ ወቅት በውጤታቸው ላይ 5 ነጥብ ተጨምሮ እንዲወዳደሩ የሚያደርግ አሠራርም ተቀምጧል። ዩኒቨርሲቲዎች ከተቀመጠው መስፈርት ውጭ በግለሰብ ጥያቄ ወይም በልዩ ትዕዛዝ የትምህርት መስክ ምደባን መቀየር እንደሌለባቸውም ሚኒስቴሩ አስቀምጧል። 3. የተማሪዎች ዝውውር ከአንድ ዩኒቨርሲቲ ወደ ሌላ የሚደረግ የተማሪ ዝውውር የሚፈጸመው የላኪውና የተቀባዩ ዩኒቨርሲቲ ስምምነት ሲኖር ብቻ እንደሆነ ተገልጿል። ዝውውሩ ከተፈጸመም በኋላ ትምህርት ሚኒስቴሩ በደብዳቤ እንዲያውቀው መደረግ አለበት። የዝውውር ጥያቄ የሚስተናገደው ተማሪው በተመደበበት ተቋም ቢያንስ አንድ ሴሚስተር ከተማረ እና ከፕሮግራሙ ከ50 በመቶ በላይ ካልጨረሰ እንደሆነ ሰርኩላሩ ይገልጻል። ተማሪው የአካዳሚክ ጉድለት (F፣ NG ወይም I) የሌለበት፣ አማካይ ውጤቱ 2.00 እና ከዚያ በላይ የሆነ እና የዲሲፕሊን ጥፋት ያልፈጸመ መሆን አለበት። በደኅንነት ስጋት፣ በጤና ችግር ወይም በሌላ ተመሳሳይ ልዩ ሁኔታ የሚቀርብ የዝውውር ጥያቄም በሕጋዊና በተረጋገጠ ማስረጃ መደገፍ እንዳለበት ተገልጿል። በተጨማሪም ከመንግሥት ወደ ግል ከፍተኛ ትምህርት ተቋም ዝውውር የሚፈቀድ ሲሆን፣ ከግል ከፍተኛ ትምህርት ተቋም ወደ መንግሥት ዩኒቨርሲቲ ዝውውር እንደማይፈቀድ ተቀምጧል። ዝውውር በአንድ ዩኒቨርሲቲ ካምፓሶች መካከል፣ ከአንድ ዩኒቨርሲቲ ወደ ሌላ ዩኒቨርሲቲ ወይም ከአንድ ፕሮግራም ወደ ሌላ ፕሮግራም ሊፈጸም እንደሚችልም ሰነዱ ያስቀምጣል። በተፈጥሯዊ ወይም ሰው ሠራሽ አደጋ፣ በደኅንነት ችግር ወይም በሌላ ልዩ ሁኔታ ከመደበኛው የዝውውር አቅም በላይ የሆነ የቡድን ዝውውር የሚያስፈልግ ከሆነ፣ ዩኒቨርሲቲዎች በራሳቸው ውሳኔ ከመፈጸም ይልቅ ጉዳዩን ለትምህርት ሚኒስቴር በማቅረብ በሚሰጠው አቅጣጫ መሠረት እንዲፈጽሙ ታዘዋል። 4. ቅሬታዎችና ግልጽነት ዩኒቨርሲቲዎች ከተማሪዎች የሚቀርቡ የቅበላ፣ የትምህርት መስክ ምደባና የዝውውር ቅሬታዎችን የሚቀበል፣ የሚመረምርና በወቅቱ ምላሽ የሚሰጥ ግልጽ የአሠራር ሥርዓት እንዲኖራቸው ተብሏል። የቅበላ፣ የትምህርት መስክ ምደባና የዝውውር ውሳኔዎችም በግልጽ መስፈርት፣ በተሟላ ማስረጃና በሰነድ የተደገፉ መሆን እንዳለባቸው ሚኒስቴሩ አስታውቋል። በመጨረሻም ሁሉም የመንግሥት ዩኒቨርሲቲዎች ከሰርኩላሩ ጋር የሚቃረን የተለየ አሠራር እንዳይከተሉ፣ በተማሪዎች ቅበላ፣ በትምህርት መስክ ምደባና በዝውውር ወቅት የተቀመጡትን መስፈርቶች በወጥነት እንዲፈጽሙ ተመላክቷል። ቲክቫህ ኢትዮጵያ መስከረም 13 ቀን 2019 ዓ/ም @tikvahethiopia

ወደ ትግራይ ክልል በረራ ተቋረጠ። የኢትዮጵያ አየር መንገድ በትግራይ ክልል ባለው ወቅታዊ ሁኔታ ምክንያት ወደ መቐለ ፣ አክሱም እና ሽሬ የሚያደርገውን በረራ ከዛሬ መስከረም 13 ቀን 2019 ዓ.ም ጀምሮ ለጊዜው ማቋረጡን አሳውቋል። " በበረራዎቹ መቋረጥ ምክንያት በደንበኞቻችን ላይ ለሚደርሰው መጉላላትም ከወዲሁ ይቅርታ እንጠይቃለን " ብሏል። በረራዎቹ እንደገና ሲጀምሩ የሚያሳውቅ መሆኑን ገልጿል። መስከረም 13 ቀን 2019 ዓ/ም @tikvahethiopia

Без текста

‎" ግለሰቡ ' ተሰድቤያለሁ ሰው እገድላለሁ ፤ እኔም እራሴን አጠፋለሁ ' በሚል ' ቤተሰቦቼ የሚያለቅሱበትን የሀዘን መግለጫ ባነር ነው ያሰራሁት ' ነው ያለን " - የሰሜን ቤንች ፖሊስ አዛዥ ‎ ‎በደቡብ ምዕራብ ኢትዮጵያ ክልል፣ በቤንች ሼኮ ዞን ሰሜን ቤንች ወረዳ ኦቃ ቀበሌ ልዩ ስሙ ሚዳ በተባለ አካባቢ የራሱን " ከዚህ ዓለም በሞት ተለየ " የሚል የሐዘን መግለጫ ባነር በማሰራት፣ የተቀየመውን ሰው ገድሎ ራሱን ለማጥፋት ሲዘጋጅ የነበረ ግለሰብ በፖሊስ ቁጥጥር ሥር ማዋሉን የወረዳው ፖሊስ አዛዥ ኢንስፔክተር ዘለቀ ኮሺካ ለቲክቫህ ኢትዮጵያ ተናግረዋል። ‎ ‎ኢንስፔክተር ዘለቀ እንደገለፁት ድርጊቱን የፈጸመው አቶ ማሌች ሚቲኩ ገተራሻ የተባለ የ31 ዓመት አባወራ እና የሁለት ልጆች አባት ነው። አቶ ማልች ከተጣላው አካል ጋር በነበረው አለመግባባት ግለሰቡ " ሟርተኛ " ሲል ሰድቦኛል በሚል በትናንትናው ዕለት መስከረም 12/2019 ዓ/ም በቂም በቀል ተነሳስቶ ግለሰቡን ለመግደልና እራሱንም ለማጥፋት አቅዶ ለዚሁ እቅዱ ማስፈጸሚያ ይረዳው ዘንድ የራሱን የሐዘን መግለጫ ባነር በቅድሚያ አሳትሞ በማምጣት በዕለቱ መጠጥ እየጠጣና በማስፈራሪያዎች ሲፎክር ከህብረተሰቡ በደረሰ ጥቆማ መያዙን ገልፀዋል። ‎ ‎ግለሰቡ በቁጥጥር ስር ከዋለ በኋላ " ባነሩን ያዘጋጀሁት ቤተሰቦቼ እኔን እያሰቡ እንዲያለቅሱበት ነው " በሚል ለፖሊስ ቃሉን መስጠቱን ያነሱት ​የፖሊስ አዛዡ ድርጊቱ በአካባቢው አዲስና ያልተለመደ በመሆኑ ለህብረተሰቡ ግንዛቤና ማስጠንቀቂያ እንዲሆን በሚዲያ ማውጣታቸውን አስታውቀዋል። ‎ ‎​በአሁኑ ወቅት ተጠርጣሪው በፖሊስ ቁጥጥር ሥር የሚገኝ ሲሆን ጉዳዩ በሕግ አሰራር መሠረት የሚኖረውን ቀጣይ አካሄድ ከሚመለከታቸው የሕግ አካላት ጋር እየተመረመረ ይገኛል ሲሉ ለቲክቫህ ኢትዮጵያ አስረድተዋል። ቲክቫህ ኢትዮጵያ ሀዋሳ መስከረም 13 ቀን 2019 ዓ/ም @tikvahethiopia

Без текста