Тажовуз ортида нима бор?..
Тадбиркор Бекмурод Ярмаматов - 58 ёшда. Ўтган йили яхши ниятлар билан Умра зиёратини адо этганди. 7 нафар фарзанднинг отаси, 9 нафар жажжи болаларнинг бобоси эди. Ибодатда қоим, чироқчиликлар орасида диёнатли инсон сифатида ном чиқарганди. Президентнинг тадбиркорларга оид сиёсатидан илҳомланиб, шу касбнинг бошини тутганди.
Қашқадарё вилояти Кўкдала тумани Кўкдала МФЙ Эркин Воҳидов кўчасидаги автобекатда дўкон очиб, тирикчилик қилаётганди. Мазкур хўжалик субъекти очиқ савдода сотиб олиниб, унга Чироқчи тумани ҳокими Р.Жўрақобиловнинг 2018 йил 8 июндаги қарори билан 48 кв.метр ер ажратилганди. Ўнлаб идораларнинг хулосалари билан тадбиркорлик субъектининг ҳуқуқий асослари яратилганди.
Бироқ Чироқчи тумани иккига бўлиниб, тадбиркорлик субъекти янги ташкил қилинган Кўкдала тумани ҳудудида қолгач, туман ҳокимлиги ободонлаштириш баҳонасида дўконни бузишга ҳаракат қила бошлади. Тадбиркорлик фаолиятига аралашув, қонуний асосларсиз электр токини узиб қўйиш, таъқиб ва тазйиқлар Бекмурод Ярмаматовни ҳолдан тойдирди. Тадбиркор туман ҳокими Хуррам Жўраев қабулида бўлди, орага одам қўйди, ёзди, ялинди, бироқ ҳоким юмшамади: бузасан, тамом-вассалом! Орада ФИБ Чироқчи тумани судининг объектни бузиш ҳақида қарори чиқди, аммо ҳали олдинда аппеляция бор эди, суд қарори кучга кирмаганди!
14 октябрь куни маҳаллий пахта пункти олдида тадбиркор туман ҳокими Хуррам Жўраевга тажовуз қилди, уни оғир яралади. Воқеа жойига раҳбарлар, ҳуқуқни муҳофаза қилиш органлари вакиллари етиб келишди, Республика Бош прокуратурасининг АМИБ терговчиси тадбиркорга нисбатан ЖКнинг 25-моддаси орқали 97-моддаси билан иш қўзғатди. Ҳоким Республика Шошилинч Тез Тиббий Илмий Марказига ётқизилди, тадбиркор қамоққа олинди, ҳозирда тергов ҳаракатлари бормоқда.
Ҳоким - ҳокимият тимсоли, унга тажовуз ҳокимиятга тажовуздир. Бундай жиноятни содир этган шахс шубҳасиз қонунда белгиланган жазога мустаҳиқ, аммо жиноятни келтириб чиқарган омилни ҳам эсдан чиқармаслик лозим. Эҳтимол, тадбиркор унинг ҳуқуқлари ҳимояланмаслиги туфайли мушкул вазиятда қолмаганида, давлат мулозимлари кенглик қилганида бу жиноят содир бўлмасмиди, билмадим.
Афсуски, бу воқеа узоқ йили фуқаро томонидан ўт қўйиб юборилган Яккабоғ тумани ҳокимининг қонунбузар ўринбосари воқеасини ёдга солади. Шу боисдан маҳаллий раҳбарларнинг хатти-ҳаракатлари, уларнинг нечоғли адолатли қарорлар қабул қилиши маҳаллий халқ депутатлари кенгашлари томонидан ўрганилиши ва баҳо берилиши лозим. Акс ҳолда, фуқаро қонунни бузиб бўлса-да, “сўнгги чора”ни қўллашга жазм қилади.
Тергов ҳаракатлари бораётгани боис жиноят ишига оид материалларни ошкор қилмайман, аммо куни келиб бу ҳолат тафсилотлари жамоатчилик муҳокамасига чиқади.
Манба